Detaje të reja dalin në dritë në lidhje me grabitjen e ndodhur në postën e Krujës nga ku u vodhën plot 110 mln lekë, të cilat kishin ardhur për pensionet. Dyshohet se grabitësit kishin marrë informacion të sigurt se ku ndodheshin paratë dhe kjo gjë shihet nga kasaforta e cila është zbërthyer.
Në postën e Krujës, ku drejtor është Xhelal Rraja, vëllai i deputetit Rrahman Rraja, ka dy kasaforta dhe ata kanë hapur me dhunë vetëm njërën prej tyre, aty ku ndodheshin 110 mln lekët, që kishin ardhur për pensionet vetëm një ditë më parë në postë.
Të njëjtat burime shprehen se në orët e para të mëngjesit të ditës së sotme janë fikur dritat në të gjithë Krujën, fiks në orën 02:20. Gjatë kohës që nuk ka pasur drita, grabitësit janë futur dhe nën ‘hundën’ e rojes, Besnik Parruca që tashmë është arrestuar kanë vjedhur 110 milionë lekësh.
Ndërkohë pavarësisht kësaj grabitjeje, mësohet se filiali i postës në Krujë ka punuar gjatë gjithë ditës së sotme.
Në lidhje me këtë ngjarje është arrestuar roja i postës, Besnik Parruca për mos kallëzim krimi dhe shpërdorim detyre. Parruci 51 vjeç, banues në Durrës, mësohet se në momentin që ka pikasur hajdutët nuk ka telefonuar policinë.
Madje, në momentin që ka kaluar patrulla e policisë dhe e ka pyetur 51-vjeçarin nëse ka ndonjë problem, ai e ka mohuar këtë gjë duke thënë se është gjithçka në rregull.
Për shpërdorim detyre është vënë në pranga edhe një punonjës poste, i cili pasi ka vënë re mungesën e parave nuk ka telefonuar policinë. /dosja.al
