Kryebashkiaku i Rilindjes në Gramsh, Klodian Taçe, përmes një postimi në rrjet njofton se ka urdhëruar pezullimin e procedurave të mëtejshme të lidhjes së kontratës me kompaninë që mori tenderin për “Blerje dru zjarri për nevojat e shkollave për vitin 2019”.
Reagimi i Taçes vjen një ditë pasi PD denoncoi shkeljen e Kryebashkiakut, pasi kishte shpallur fitues të tenderit një firmë që gjendet nën sekuestro, sepse nuk ka paguar gjobat për prerjen e pyjeve.
Zëdhënësja Ina Zhupa informoi se Taçe ka shpallur fituese kompaninë të vetme në garë “Al-Mexwood”sh.p.k” me ofertën në vlerën 5 .863. 650 Lek dhe se sipas saj, kjo kompani ka mbështetjen e kreut të grupit parlamentar socialist, Taulant Balla.
“Kompania “Al-Mexwood”sh.p.k” ka marrë pjesë në tender në kundërshtim me ligjin “Për prokurimin Publik” pasi rezulton me detyrime të pa paguara , konkretisht ndaj Inspektoriatit Shtetëror të Mjedisit dhe pyjeve në vlerën 126.000 Leke. Sipas urdhrit të përmbarimit për sekuestro nr.2012 datë 10. 10.2019 është vendosur sekuestro mbi këtë kompani për shkak të ndëshkimit me gjobë për prerjen e pyjeve ne kundërshtim me ligjin. “, tha Zhupa.
Pas këtij denoncimi, Taçe në një postim në rrjet falenderon PD-në, ndonëse e konsideron sulmin si politik.
“Dokumentacioni i paraqitur pranë bashkisë dhe komisionit të prokurimit është i rregullt dhe afati kohorë i dokumenteve është brenda afatit të procedurës së tenderimit, ndërsa gjatë afatit të çeljes së procedurave të tenderimit, firma në fjalë ka qënë i vetmi operator ekonomik qe ka aplikuar”, shkruan ai.
