Kryeministri, Edi Rama në një postim në rrjetin e tij Facebook shkruan se Partia Demokratike u dorëzua nga presioni i jashtëzakonshëm popullor dhe ndërkombëtar, të cilët sipas tij luajtën një rol të rëndësishëm në miratimin e reformës në drejtësi.
Edhe pse në votimin e reformës në drejtësi lidhur me konsensusin dhe më pas me miratimin e saj një rol luajti dhe koalicioni qeverisës LSI-ja, në shkrim, Rama nuk e përmend aleatin. Ai paralajmëron se ata që u dorëzuan falë këtij presioni do të vazhdojnë të rezistojnë për çdo ligj që duhet për zbatimin e reformës.
Vec PD edhe LSI e kundështoi projektin e Ramës për mënyrën e miratimit të anëtarëve të 4 institucioneve të reja të drejtësisë dhe për vetting-un.
Deklarata e Ramës:
“Reforma në Drejtësi do të vazhdojë me ligjet kryesore që pasojnë reformën e miratuar kushtetuese dhe kërkojnë minimumi 84 vota. Ata që u dorëzuan përballë presionit të jashtëzakonshëm popullor e ndërkombëtar dhe presionit të brendshëm që krisi murin shurdh të Partisë Demokratike, do të vazhdojnë të rezistojnë në çdo hap e për çdo ligj të domosdoshëm për zbatimin e reformës kushtetuese. Por nuk kanë shans ta ndalin historinë e re të drejtësisë që ka nisur me hirin dhe me pahirin konsensual të 21 korrikut.
Shqipëria nuk është më ajo që ishte përpara votimit historik të së enjtes së shkuar; jo vetëm në sytë e Washingtonit, Berlinit e Brukselit, po edhe në sytë e komunitetit ndërkombëtar të investitorëve, vendi ynë ka fituar një besueshmëri të re. Votimi i 21 korrikut i ka hapur rrugë një reforme shembullore në drejtësi dhe vetingu me mbështetje ndërkombëtare (parashikuar në kushtetutë) i të gjithë gjykatësve e prokurorëve, i cili do të nisë si një operacion rrënjësor pastrimi nga maja e piramides së korruptuar të gjyqësorit, i ka bërë të marrin frymë lirisht investitorët e mëdhenj. Këtë e konfirmoi sot vetë Presidenti i Bankës Europiane për Rindërtim e Zhvillim”.
