Emisioni Top Story në puntatën e sotme po trajton zgjedhjet lokale të vitit 2016 në Dibër për të cilat gazeta gjermane BILD publikoi disa përgjime ku zyrtarë të lartë dëgjoheshin teksa bënin presione për votën apo pazare për blerje votash.
Sipas demokratëve, skema e shitblerjes së votës përfshinte edhe grupe kriminale që kultivonin kanabis. Edhe pse Dibra nuk ishte lakuar më parë, si zonë e nxehtë kultivimi, akuzat u intensifikuan në fushatë.
“Nuk ishin Dibranët që mbillnin kanabis, kam takuar lazaratas në rrugët e Dibrës, edhe gati ma tha copë për çfarë ishte. E kuptova nga dialekti, më foli, më përshëndeti, si je shefo më tha, e kuptova që nuk ishte nga Dibra e ma tha copë. Kam ardhur për punë se këta ktej kanë nevojë për ne”, tregon Edi Paloka, Nënkryetar PD
Mbetet ende e paqartë sesi ish deputeti Paloka kishte identifikuar një trafikant, më pas ishin përshëndetur dhe kishin biseduar për kultivimin e kanabisit.
“Po Lulzim Basha dhe establishment i tij politik që në 114 fshatrat e Dibrës shkonin nga 2 herë në ditë, keni parë ndonjë pamje filmike të xhiruar”, tha Ulsi Manja, Deputet PS
“Vetë fshatarët që na informonin se ne sigurisht nuk futeshim nëpër shkurre e ferra se skishim vajtur për të gjurmuar atje kanabisin”, tregon Edi Paloka, Nënkryetar PD
Denoncimet aso kohe ishin vetëm publike, nga foltorja e selisë blu, duke shmangur policinë ose prokurorinë.
“Unë denoncoja në ato kohë parcelat e shefit të komisariatit, dhe ai do shkonte për të zbuluar parcelat e tij?” pohon Flamur Noka.
