Lulzim Basha, kryetar i PD-së, tha se është partizan i sistemit mazhoritar. Duke folur në studion e Syri.net, Basha tha se raporti i OSBE/ODIHR thotë se korniza ligjore garanton zgjedhje të lira, duke shtuar se mungon vullneti politik i Edi Ramës për të garantuar zgjedhjet.
“Pse Kodi Zgjedhor e ka fajin se Rama kandidon kandidatë me precedentë kriminalë, që përdor bandat për të tjetërsuar vullnetin e zgjedhësve?
Vullnet politik do të thotë që të zbatosh ligjin dhe ne e kemi shprehur se Rama nuk ka vullnet politik”, tha kreu demokrat.
Sipas tij, 5 pikat e propozuara në një dokument të opozitës, kanë ardhur pas 9 kushteve të vendosura nga Bundestagu.
“Opozitës iu ngrit një kurth, në momentin që Bundestagu po përgatiste kushtet që iu vunë Shqipërisë për hapjen e negociatave, i takonte Qeverisë që të bënte një propozim, dhe të mos mjaftohej me batuta dhe fletë-rrufe.
Rama tentoi të fshihte krizën përmes një tryeze të rrumbullakët, që ne t’i thonim JO pjesëmarrjes në të dhe ai të deklaronte se me këtë opozitë nuk punohej.
Pjesëmarrja jonë në tryezë i tregon aleatëve tanë europianë dhe amerikanë se ne jo vetëm kemi vullnetin, por ofrojmë edhe zgjidhjet”, tha Basha.
Kreu demokrat tha se nuk e dinte nëse OSBE ishte pjesë e këtij kurthi, apo ra në kurthin e ngritur nga Edi Rama.
