Të tjera detaje dalin në dritë nga rrëmbimi i një 13-vjeçareje sot në rrugën ‘Ndre Mjeda’ në Tiranë, e cila sapo kishte zbritur nga furgoni i shkollës. Ashtu si për çdo ditë vajza po vinte nga shkolla, ndërsa u rrëmbye vetëm pak metra larg shtëpisë.
Vajza me inicialet S.B, ka bërë rezistencë dhe nuk ka dashur të hipë në automjet. Pavarësisht se ajo ka bërtitur, duke tërhequr edhe vëmendjen e qytetarëve, autori ka arritur që të fusë forcërisht në makinë 13-vjeçaren.
Mes të tjerash mësohet se në furgonin e shkollës 13-vjeçarja ka qenë së bashku me të motrën. Skena është parë nga gjyshja që ishte në ballkon duke pritur mbesat dhe ka qenë pikërisht ajo që ka njoftuar policinë. Po ashtu nga dëshmitë është mësuar se në automjet ka qenë vetëm një person.
Forcat e gjithë komisariateve nr. 3,4 dhe 5, aktualisht janë në terren, ndërsa janë vënë në ndjekje për të kapur autorin.
