Nga Boldnews.al
Një drejtor kadastre në Durrës u soll me pranga në duar. “Shpërdorim detyre” është akuza ndaj Liridon Pulës, i dyshuar se ka abuzuar me pronat, kryesisht në zonën e bregdetit. Për nga rangu, është një zyrtaruc i mesëm i Rilindjes, në mbrojtje nuk kishte vetëm avokatin e tij, por edhe nënkryeministrin Erion Braçe.
Nënkryeministri Erion Braçe, e quajti vendimin për të lënë më masën e sigurisë arrest me burg si një akt të paprecedent. Sipas Braçes, drejtori i Kadastrës në Durrës nuk ka hasur në asnjë parregullsi. Ai akuzoi prokurorin e çështjes Arjan Ndoja se “ka ushtruar presion ndaj punonjësve për të tjera objekte, duke përdorur çështjen në fjalë”.
Braçe tha se prokurorë dhe gjyqtarë të tillë që nuk kanë kaluar Vettingun nuk duhet të ekzistojnë në institucionet shqiptare. Po kush është Braçe që sot bën prokuroin dhe gjyqtarin? A nuk janë këta zyrtarë të lartë politik që nëpërmjet zonjës 69-tëshe kontrollojnë deri në imtësi institucionin e akuzës?
Nëse del ndonjë që është kundër interesave të tyre, atëherë sulmohet, anatemohet, kërcënohet se do i presë kokat “vettingu”, apo e akuzojnë edhe për lidhje me bandat kriminale. Shantazhi është i hapur, në dukje mund të duket i kalueshëm nga ajo që paraqet në aparencë Braçe, por ai ka nxjerrë “luanin” brenda tij, sepse është nurmi dy i qeverisë.
Sot në Durrës ai shkoi si përfaqësues qeverie, jo si i afërm, apo familjar i të pandehurit. Liridon Pula akuzohet për shpërdorim detyre lidhur me një objekt i cili ka marrë leje zhvillimi dhe leje ndërtimi. Një ditë më parë, nga foltorja e Kuvendit, ndonëse nuk përmendi emra, kryeministri Edi Rama tha se “një prokuror në Durrës është i lidhur me bandat e krimit”.
Mjaftoi ajo deklaratë që sot, nënkryeministri “ta zbulonte” se cili ishte ky prokuror. Rilindja ka dy qëndrime për drejtësinë. Dosjet 184 dhe 339 që mbartin krimin e madh elektoral dhe lidhjen e politikës me trafikantë droge dhe të dënuar për vrasje kur mbyllen janë punët e “drejtësisë së pavarur”, ndërsa në raste të tjera, ku në pranga përfundon një “peshk i vogël”, por që ka lidhje me peshkaqenjt e kupulës drejtuese, ndërhyhet nga politika. Shantazh i pastër prania e numrit dy të qeverisë në një sallë gjyqi.
Nuk është fjala vetëm për një drejtor kadastre, por një individ që kishte në duar vulën e firmën për të dhënë prona. Duket se i kishte kollondrisur mirë punët, përderisa ka miq kaq të fortë të gjatin dhe dhe të voglin në qeveri.
Ka edhe një rrugë të shkurtër, më efikase, të cilët e kanë përdorur gjerësisht jashtë vëmendjes publike. Me një telefonatë të shkurtër, prokurori mund të transferohet me udhër nga lart. Në deklarimet e fundit kryeministri Edi Rama tha se: “Nuk arreston qeveria, por drejtësia”, duke u justifikuar se nuk ka asgjë në dorë për të ndikuar në ndalimin e zyrtarëve të korruptuar, apo të bashkëpunëtorëve të tij të kapur në përgjimet në krimin e tmerrshëm elektoral në Dibër.
Por ky është edhe një mesazh drejtuar ndoshta një zyrtaruci të mesëm të Durrësit, në dërgimin e sinjalit: “na i bëj hallall disa ditë burg, por ne jemi me ty”. Dhe për të provuar se janë me të, i dërgoi bash e zëvendësin e tij, që u mundua fort të binte në sy dhe jepte sinjalin ke mbrojtjen tonë.
