Gjithkush që ka abuzuar me pushtetin do të japë llogari. Deklarata u bë mbrëmjen e së enjtes në emisionin “Real Story” nga Kryeministri Edi Rama, i cili u shpreh optimist se reforma në drejtësi do të japë frytet e saj.
“Unë e di që njerëzit këtu janë të etur për drejtësi dhe kanë të drejtë. Unë e di që këtu nuk janë dënuar shumë që meritojnë të dënohen. Por, kjo nuk bëhet me shkop magjik. Fute mrena Ilir Metën, fute mrena Sali Berishën. Pse çfarë jam unë? Unë jam kryeministër. Unë nuk jam prokuror dhe as gjykatës”, tha Rama.
Drejtuesi i emisionit, gazetari Sokol Balla, e pyeti Ramën lidhur me prokurorin e Durrësit, që përmendi gjatë seancës parlamentare, ndërsa Kryeministri tha se ai është një shëmbëlltyrë e bashkëpunimit me krimin e organizuar.
“Një prokuror që shkon dhe kërcënon dhe pastaj e arreston tjetrin pa asnjë provë, është kriminel. Procesi i reformës dhe i shtetbërjes nuk është diçka se ndodh se tha Edi Rama. Në një moment ka ngecje, por po pastrohet llumi.
Pastrohen këta, janë këta pisat e tjerë që thonë se të ikur se të ikur jemi dhe kanë nxjerrë një shprehje që ne jemi si në Brexit. Nuk kanë për të shpëtuar.
Jo se do u qepem nga mbrapa. Llogaritë do lahen këtu. Do marrin kohë por do lahen këtu. Llogaritë e këtyre pisave do lahen këtu të gjitha. Kush ka fatin të jetojë 10 vitet e ardhshme do ta shohë”, tha Rama.
