Ndryshon akuza për Blendi Tetën, të vetmin të arrestuar lidhur me ekzekutimin e Santjago Malkos, krim i ndodhur mbrëmjen e 27 gushtit në Tiranë.
Disa ditë pas vrasjes, Teta u arrestua nga policia i akuzuar për moskallëzim krimi dhe më pas u la në qeli nën masën e arrestit me burg nga gjykata. Por, tanimë hetimet marrin një tjetër kthesë. Teta po hetohet për akuzën e vrasjes me paramendim në kuadër të grupit të strukturuar kriminal.
Në dëshminë e tij para hetuesve, Teta pretendonte se ishte është gjendur ne vendin e ngjarjes, por s’kishte lidhje me vrasjen. Ai ka thënë se ka qenë në shoqërinë e personave të tjerë në kërkim për vrasjen gjatë ditës kur ndodhi krimi, por është larguar para se të ndodhte vrasja. Ndërkohë, pamje të kamerave të sigurisë, kanë fiksuar Tetën në vendin e vrasjes, fill pas krimit.
Sipas hetimeve, pas ekzekutimit të Malkos, Teta ka aplikuar për vizë në Kubë, me qëllim largimin nga vendi.
8 në kërkim
Tetë persona janë shpallur në kërkim lidhur me ekzekutimin e ish-policit Santjago Malko. Ata janë Leonard Duka, Elis Duka, Xhoni Nica, Oltian Loka, Ilir Selmani, Aleksandër Maxhaku Dritan Agaj, të shtatë banues në Tiranë si dhe Fatmir Hyseni, banues në Vlorë.
Ndaj tyre, gjykata e Shkallës së Parë Tiranë ka vendosur si masë sigurimi personal “arrest me burg” në mungesë, duke pranuar kërkesën e akuzës. Ata akuzohen për kryerjen e veprave penale “Vrasja me paramendim”, “Mbajtja pa leje e armëve shpërthyese dhe municionit” dhe “Vjedhja”.
“Grupi hetimor gjatë veprimeve procedurale ka arritur të gjejë dhe sekuestrojë në cilësinë e provës materiale 8 automjete, mes tyre dhe automjetet e përdorura nga autorët për të kryer krimin, si dhe sendet e gjetura në brendësi të tyre”, njoftoi policia.
Dosja, tanimë i ka kaluar prokurorisë së Krimeve të Rënda.
