Publikohen pamjet e ngjarjes së 27 qershorit 2018 në një lokal në Kinostudio, ku u plagosën dy vëllezërit Rivelino dhe Juxhin Mumajesi. Në pamje, duket ish-polici Santiago Malko, i cili shfaqet në fund të shkallëve të lokalit teksa qëllon me armë zjarri pas një konflikti dy të vëllezërit. Nga pamjet e filmuara nga kamera e sigurisë së lokalit ku ndodhi ngjarja, Malko mund të identifikohej nga policia dhe të arrestohej, por policia nuk ka vepruar.
Në krye të herës, policia deklaroi se ishte duke punuar për identifikimin e autorëve të krimit. Krahas veprimeve të tjera hetimore, oficerët e krimeve sekuestruan edhe kamerat e sigurisë së lokalit, që kanë filmuar këto pamje. Sikurse dallohet qartë në to, në lokal me armë në dorë shfaqet ish-oficeri i Patrullës së Përgjithshme, Santjago Malko, i cili u ekzekutua me 27 gusht të këtij viti në rrugën “Xhanfize Keko”.
Ai qëllon ndaj dy vëllezërve dhe mikut të tyre. Mumajesët ishin të paarmatosur, siç dallohet në video, ata kapin karriget dhe i hedhin në drejtim të atentatorëve, në përpjekje për t’iu shpëtuar plumbave.
Pavarësisht se policia e ka pasur në duar këtë video dhe burimet thonë se mundi të identifikonte atentatorët dhe ata ishin Malko e miku i tij me inicialet R.M. mbetet e paqartë, përse nuk ndërhyri për t’i arrestuar.
Ekzekutimi i Santiago Malkos, 8 persona në kërkim
Tetë persona janë shpallur në kërkim lidhur me ekzekutimin e ish-policit Santjago Malko, mbrëmjen e 27 gushtit në Tiranë, ka konfirmuar Policia e Shtetit. Ata janë Leonard Duka, Elis Duka, Xhoni Nica, Oltian Loka, Ilir Selmani, Aleksandër Maxhaku Dritan Agaj, të shtatë banues në Tiranë si dhe Fatmir Hyseni, banues në Vlorë.
Ndaj tyre, gjykata e Shkallës së Parë Tiranë ka vendosur si masë sigurimi personal “arrest me burg” në mungesë, duke pranuar kërkesën e akuzës. Ata akuzohen për kryerjen e veprave penale “Vrasja me paramendim”, “Mbajtja pa leje e armëve shpërthyese dhe municionit” dhe “Vjedhja”.
Më herët, po për këtë ngjarje është ndaluar me urdhër të Prokurorisë së Rrethit Gjyqësor Tiranë dhe Blendi Teta, banues në Tiranë, i akzuar për moskallëzim krimi.
“Grupi hetimor gjatë veprimeve procedurale ka arritur të gjejë dhe sekuestrojë në cilësinë e provës materiale 8 automjete, mes tyre dhe automjetet e përdorura nga autorët për të kryer krimin, si dhe sendet e gjetura në brendësi të tyre”, njoftoi policia.
Dosja, tanimë i ka kaluar prokurorisë së Krimeve të Rënda.
