Ndahet nga jeta në moshën 61-vjeçare ish-arbitri i futbollit të Kolegjumit të Arbitrave të Elbasanit, Myrteza Allkja.
Me një kontribut të madh në arbitrimin shqiptar, karriera e Myrteza Allkjes do të niste në vitet 80’ përkrah emrave të shquar të arbitrimit kombëtar, si një vazhdim i traditës së arbitrave të njohur të Elbasanit.
Myrteza Allkja shumë shpejt do të shquhej si një arbitër i ri me perspektivë dhe shumë i aftë. Ai ishte një përfaqësues i një brezi të ri dhe FSHF do t’i besonte drejtimin e ndeshjeve shumë të rëndësishme. Deri ditën që u nda me arbitrimin, Myrteza Allkja do të mbetej një “bilbil” mjaft autoritar, i admiruar nga skuadrat dhe sportdashësit në çdo stadium që arbitroi. Njeri korrekt në fushë dhe jashtë saj edhe me detyrën e vëzhguesit të FSHF-së.
Ai do të mbahet mend edhe për faktin që ka arbitruar i pari një ndeshje me drita në Shqipëri. Bëhet fjalë për derbin Tirana-Partizani 1-0, të luajtur më 5 gusht të vitit 1997 në orën 21:00. Allkja vuante nga një sëmundje e rëndë dhe nuk ia doli dot. Varrimi bëhet nesër (e mërkurë 2 tetor) në orën 15:00 në Elbasan. Gazeta “Panorama Sport” u shpreh ngushëllimet më të sinqerta familjarëve për humbjen e njeriut të tyre të dashur. Mësohet FSHF ka dhënë urdhër që në nder të tij, të mbahet një minutë heshtje para se të fillojnë ndeshjet e Kupës së Shqipërisë që do të luhen të nesër.
/PANORAMASPORT.AL
