Ish-ministri i Drejtësisë, Ylli Manjani shprehet se drejtësia s’po vepron si duhet. Deklaratën e bën teksa i referohet akuzave për kreun e PD-së Basha për lobimet rustë dhe vendimit të drejtësisë amerikane për foton e kryeministrit Edi Rama me Barack Obamën, në kohën kur ky i fundit ishte kreu i Shtëpisë së Bardhë.
“Lulzim Basha, kryetar i PD, mbi një supozim portali në Amerikë, pa asnjë provë direkte është marrë i pandehur për një pagesë inekzistente konsulentit të huaj. Me këtë të fundit PD kishte një kontratë, si dokument legal dhe, ka pagesa të provuara në bankë. Ndërsa gjykata Amerikane, provon tashmë se Edi Rama ka paguar 80.000 dollarë për një foto me Obamën. Këtë pagesë askush nuk e di si u bë, nga ç’llogari, ç’bankë e me çfarë kontrate?!!! Por Edi Rama nuk merret i pandehur, megjithëse fakti penal është EVIDENT”, shkruan Manjani në një status në Facebook.
“Por Edi Rama nuk merret i pandehur, megjithëse fakti penal është evident”, shton.
“Sa më takon, nuk jam për burgosjen e as njërit, por kush të gjendet fajtor të paguaje paratë dhe të ndalohet të kryejë detyrë publike. Por si fillim duhet të jenë të dy njësoj para ligjit! Këtu kemi mbetur dhe as kjo ‘FBI’ virtuale këtu në Tiranë spo na bën asgjë…”, e mbyll reagimin ish-ministri i Drejtësisë në qeverinë “Rama 1”.
William Argeros, i cili sajoi një kontribut të paligjshëm nga një i huaj në një komitet të përbashkët për mbledhjen e fondeve për presidentin Barack Obama në vitin 2012, u dënua me katër muaj heqje lirie, raportuan këtë të martë mediat amerikane. Avokati i tij tha se kandidati ishte Edi Rama, kryeministër i Shqipërisë.
Dënohet me burg njeriu që pagoi 80 mije euro për foton e Ramës me Obamën
