Maxhoranca ka pranuar draftin e ri, të propozuar sot nga ambasadorët e SHBA-ve dhe BE-së, pasi palët kanë ‘prishur’ marrëveshjen e djeshme.
Prej orësh, kreu i Kuvendit, Ilir Meta, kryeministri Edi Rama dhe kreu i opozitës Lulzim Basha ishin mbyllur në Kryesinë e Kuvendit për të negociuar deri në një konsensus për propozimin e ri.
Rreth orës 17:10 Kreu i Kuvendit ka lënë kryesinë duke pranuar draftin. Po kështu edhe Rama, ndërsa ende nuk ka një përgjigje nga Basha. Burime nga PD, pohojnë se kryedemokrati ka deklaruar se po vijojnë ende negociatat.
Propozimi i ri përfshin Këshillin e Lartë të Gjyqësorit dhe Këshillin e Lartë të Prokurorisë, për të cilët PD ka kërkuar që të zgjidhen sipas vettingut, me 2/3-at. Pra 3 anëtarë të shumicës dhe 2 të pakicës. Por sipas burimeve KLGJ dhe KLP nuk do të zgjidhen sipas vettingut. Në orët në vijim pritet saktësimi i këtij varianti.
