Ledio Braho, avokat i njohur, e cilësoi situatën në Shqipëri atipike dhe kaotike, që nuk lejon të bëhen parashikime.
I pyetur mbi deklarimet e Ambasadorit Luigi Soreca, që i cilësoi 9 kushtet e Gjermanisë si disa element që mund të përmbushen, Braho tha se ishte një deklaratë e pastër politike dhe aspak diplomatike.
“Soreca vjen nga Italia dhe nuk e di sesi i duken hetimet për krimet zgjedhore, që Krimet e Rënda i transferuan në Dibër.
Nuk e di se si i duken Ambasadorit Soreca mungesa e Gjykatës së Lartë dhe Gjykatës Kushtetuese, moszbatimi i Kushtetutës, pra është një deklaratë tërësisht politike.
Reforma në Drejtësi nisi nga lart-poshtë, duke shkaktuar edhe këtë kaos që kemi sot me institucionet e drejtësisë.
Kemi një prokurore të përgjithshme të emëruar nga mazhoranca, pra kemi krizën më të thellë kushtetuese e cila nuk mund të zgjidhet as me disa ditë apo disa javë”, tha Braho.
Lidhur me kushtet e vendosura nga Gjermania, Braho tha se kërkohet hetimi dhe dënimi i peshqve të mëdhenj.
“S’ka asnjë vullnet për të hetuar dhe dënuar peshqit e mëdhenj, shikoni se çfarë ndodhi në rastin e Saimir Tahirit apo me dosjet 339 apo 184.
S’ka asnjë vullnet për të ngritur SPAK dhe BKH.
Nëse nuk ndryshon rrjedha e politikës, këto dosje nuk do të hetohen dhe për shkak të afateve do të pushohen”, tha Braho.
