Një e moshuar në Tiranë i ka dhënë fund jetës duke u hedhur nga një lartësi, konfirmuan këtë të hënë burime zyrtare nga policia e Tiranës. Ngjarja ka ndodhur në rrugën “Mahmut Fortuzi”, pranë qendrës së kryeqytetit.
Sipas policisë, e moshuara ndodhej në kushte të rënduara psikologjike kur ka kryer aktin që i mori jetën.
“Rreth orës 15:45 në rrugën ‘Mahmut Fortuzi’, dyshohet se në kushte të rënduara psikologjike, është vetëhedhur nga kati i 4-të i banesës shtetasja H R., 92 vjeçe, ku si pasojë ka ndërruar jetë. Grupi hetimor po vijon punën për sqarimin e rrethanave të ngjarjes“, thuhet në njoftimin e policisë lidhur me ngjarjen.
Të dhënat e fundit të Institutit të Statistikave kanë treguar një trend rritës të vetëvrasjeve në vend. Vitin e shkuar, 213 persona në Shqipëri sipas INSTAT, i kanë dhënë fund jetës, 14 më shumë se në 2017.
