Edhe pse u tregua i kujdesshëm për të shfaqur mbështetjen ndaj SHBA dhe BE, kryeparlamentari Ilir Meta bëri përgjegjës ambasadorët në Tiranë për bllokimin e reformës në drejtësi.
Duke folur nga salla e parlamentit, Meta u shpreh se ngërçi i krijuar mes klasës politike është krijuar edhe si pasojë e qëndrimeve të ambasadorëve Donald Lu dhe Romana Vlahutin.
“Një pjesë e përgjegjësisë e kanë dhe ambasadorët që ndodhemi në këtë situatë.” – shprehet Meta.
Gjatë fjalës së mbajtur në Kuvend, Ilir Meta iu drejtua ambasadorit amerikan, Donald Lu, që po ndjek punimet së bashku me Vllahutin nga lozhet e sallës, ku e garantoi për votat e LSI-së për reformën në drejtësi.
“Dua t’i them ambasadorit amerikan mos dëgjo lartë e poshtë që Meta bën lojë! Ilir Meta nuk bën lojë! E kam thënë që të 20 votat e LSI-së do të jenë për reformën, por duhet konsensus dhe e vetmja mënyrë për të gjetur konsensus është sipas Venecias”-shtoi Meta.
