350 vota pro, 184 kundër dhe 16 abstenim mori rezoluta e grupeve parlamentare CDU/CSU dhe SPD në Bundestag, lidhur me hapjen e negociatave të Shqipërisë me BE.
Siç ka raportuar media publike gjermane DW, rezoluta parashikon që Maqedonia e Veriut të fillojë bisedimet qysh në janar, ndërsa Shqipëria do t’i nisë ato vetëm kur të plotësohen disa kushte.
Kushtet
Bëhet fjalë pak a shumë për nëntë pika:
– funksionimi i Gjyktës së Lartë dhe Gjykatës Kushtetuese
– miratimi i reformës zgjedhore;
– implementimi i reformës zgjedhore;
– ndjekja penale e gjykatësve dhe e prokurorëve që nuk e kanë kaluar provimin e Vettingut;
– ndjekja penale e akuzave për shitblerjen e votave;
– vënia në punë e prokurorisë speciale për luftimin e korrupsionit, SPAK,
– rezultate në luftimin e korrupsionit dhe krimit të organizuar, përfshirë edhe kapja dhe ndjekja penale e personave kyç të krimit, të të ashtuquajturve “peshq të mëdhenj”;
– përparime në reformën e administratës publike;
– sqarimi përfundimtar me vendim të Gjykatës Kushtetuese i ligjshmërisë së zgjedhjeve lokale të 30 qershorit 2019.
Debatet
Seanca e sotme u shoqërua me debate mes ligjëvënesve gjermanë. Peter Beyer përfaqesues i CDU/ CSU në fjalën e tij foli edhe për çështjen “Tahiri” dhe tha se “nuk na hidhni dot hi syve me atë dënim”. Ish-ministri i Brendshëm u dënua nga gjykata e Krimeve të Rënda me 5 vite burg (3.4 me gjykim të shkurtuar), që u konvertua në 3 vite shërbim prove, për akuzën e shpërdorimit të detyrës.
Nga ana tjetër deputeti i CDU/CSU, Florian Hahn tha se Shqipëria ka bërë përparim në sistemin e gjyqësorit, por ka ende punë për të bërë në luftën kundër krimit të organizuar.
“Po të votojmë për Shqipërinë i japim një shans historik. Kemi vendosur kritere shumë të forta për Shqipërinë, të ndara në dy faza. Hapja e negociatave nuk do të thotë anëtarësim”, deklaroi Florian Hahn.
Qëndrimet
Për mazhorancën, kushtet e Gjermanisë i bëjnë mirë vendit. “Kushtet e përcaktuara në dokumentin e partive të shumicës janë kushte që i bëjnë mirë dhe i duhen vendit”, u shpreh kryeministri Edi Rama një ditë më parë.
Ndërkohë, për opozitën, kushtet e Gjermanisë janë një dështim i qeverisë. Ish-kryeministri Sali Berisha u shpreh dje në një intervistë televizive se, dokumenti i parlamentit gjerman, tregon se hapja e negociatave, “është një horizont që largohet me shpejtësi”. “Goditja më fatale është kërkesa e Bundestagut që nëse Shqipëria s’performon, të anulohen negociatat”, tha Berisha.
