Kryebashkiaku i Tiranës, Erion Veliaj, ka folur sot lidhur me pasojat e tërmetit që përfshiu vendin më 21 shtator, por edhe me atë të përmbytjeve që pasoi lëkundjet sizmike.
Veliaj tha se ishte një situatë solidariteti, por shtoi se ka disa politikanë që thonë ku është pushteti im, ku janë ministritë e mija, mendojnë vetëm për bythën e tyre.
Veliaj në vijim ka bërë akuza të forta në drejtim të Inspektoriateve Mjedisore, për të cilat tha se janë të korruptuara dhe duhen shkrirë.
“Duhet ndarë një herë e mirë historia e kompetencave mes Agjensive Mjedisore dhe Bashkive, pasi një territor e ka pushteti vendor dhe një tjetër e ka agjensia”, tha Veliaj.
Kryebashkiaku i ka dhënë një përgjigje edhe kritikëve të lejeve të ndërtimit shumëkatëshe.
“E keni merakun te kullat, shikoni Plazën nuk i ka rënë asnje pllakë”, tha Veliaj.
Kryebashkiaku tha se i është dashur t’i them Kryeministrit për ata që shisnin stekat e cigareve sapo dilje nga aeroporti i Rinasit.
“Nuk e zgjidha dot, atëherë i thashë Kryeministrit, një gjë banale, por nuk e zgjidhja dot”, tha Veliaj.
Kryebashkiaku i Tiranës ka bërë përgjegjës Ministritë lidhur me bizneset që janë ngritur poshtë pallateve.
“Përgjegjësinë në raste të tilla mos e kërkoni te Bashkia, por te Ministritë”, tha ai.
“Shteti nuk mund të bëhet gango dhe t’i japë sisë çdokujt. Kush ka ndërtuar mbi kanale, duhet t’i pastrojnë vetë”, tha ai.
