Gjykata e Apelit Tiranë vendosi masën e sigurisë detyrim paraqitjeje për administratorin e “Skela Syla”, Petrit Syla, i cili u arrestua pas ngjarjes tragjike të ndodhur në Tiranë, ku dy punëtorë që rikonstruktonin fasadën e një pallati humbën jetën pas rrëzimit të skelave.
Vendimi është marrë në orën 11:54 nga trupa gjykuese e përbërë nga gjyqatarët Artur Gaxhi, Flutura Skënderi dhe Gramoz Levanaj.
Syla ishte me masën “Arrest me burg”, vendosur nga Gjykata e Shkallës së Parë, si i dyshuar për shkelje të rregullave të sigurisë në punë.
Ai u arrestua disa javë pas vdekjes së dy punëtorëve në datën 16 Gusht, të cilët po punonin në një pallat kur u rrëzua skela.
Seanca ka nisur në orën 11:00 dhe ka përfunduar në orën 11:54.
Prokuroria e Apelit ka kërkuar lënien në fuqi të vendimit të Shkallës së Parë.
