Gazetari i njohur bjellorus, Pavel Sheremet, është vrarë sot herët në mëngjes, pasi automjeti me të cilin udhëtonte ka shpërthyer në Kiev të Ukrainës.
Sheremet, 44 vjeçar, ishte duke udhëtuar për në zyrën e gazetës Ukrayinska Pravda, ku punonte. Vetura ishte pronë e shefes së kësaj gazete, Olena Prytula e cila nuk ishte në makinë.
Presidenti i Ukrainës, Petro Poroshenko, në rrjetin Facebook ka shkruar se ka urdhëruar “hetime të menjëhershëm të këtij krimi” dhe se “autorët e veprës duhet të dënohen”.
Sheremet ishte nga Bjellorusia, por pesë vitet e fundit jetonte dhe punonte në Kiev si gazetar në redaksinë e gazetës, Ukraynska Pravda, dhe moderator në Radio Vesti.
Ai, po ashtu, kishte punuar për media bjelloruse dhe ruse. Pavel Sheremet në Ukrainë ishte i respektuar nga komuniteti i gazetarëve.
“Kjë është gjë e tmerrshme dhe shumë e dhimbshme”, i tha Rel, Mustafa Nayyem, anëtar i Parlamentit të Ukrainës dhe ish-gazetar.
Sevgil Musayeva-Borovyk, kryeredaktore e gazetës Ukraynska Prvda, i tha se mendon se vrasja e gazetarit Sheremet është e lidhur me aktivitetet e tij profesionale.
Në vitin 1997, Pavel Sheremet, që ishte luftëtar për të drejta të njeriut, liri të shprehjes dhe të shtypit, ishte burgosur në Bjellorusi. Kjo burgosje e tij gjërësisht konsiderohej politike.
Ai ishte veçanërisht kritik ndaj goditjes së presidentit të Bjellorusisë, Alyaksandr Lukashenka, kundër atyre që mendonin ndryshe.
