Kryeministri Edi Rama ka zhvilluar një takim në Ministrinë e Mbrojtjes me prefektët, ministrat dhe shtabet e emergjencave, lidhur me situatën e krijuar nga tërmetet.
Rama kërkoi nga strukturat shtetërore që t’i qëndrojnë pranë qytetarëve që janë ende në panik, t’i dëgjojnë me kujdes dhe të trajtojnë me përgjegjshmëri, problemet që parashtrohen.
“Do zhvendosemi në Durrës, do kontaktojmë çdo familje që ka qëndruar jashtë përgjatë natës.
Emergjencat kanë bërë një punë të mirë, por duhet të shpërndahemi në mënyrë të strukturuar, dhe brenda ditës së sotme duhen takuar të gjitha familjet që ende janë nën panik dhe në stres.
Dje në darkë, më është dashur mua, të merrem me dritat e stadiumit. Njerëzit kanë shkuar te stadium, ndërkohë që gjëja më e thjeshtë është që dyert e stadiumit të ishin hapur dhe të kishte drita, dhe jot ë qëndronin në gjysëm-errësire.
Tërmetin nuk e parashikon dot askush, nuk do të thotë që ajo që ndodhi mund të vazhdojë, por duhet të menaxhojmë panikun dhe stresin që shkaktoi te qytetarët”, tha Rama.
Kryeministri deklaroi se Instituti i Ndërtimit ka nisur punën për të inspektuar dëmet, por duhet të koordinohemi, sepse ajo që njerëzit kanë nevojë të dëgjojnë sot është sa e sigurtë është shtëpia që kanë dhe ku venë në gjumë fëmijët.
“Të inspektohen dëmet në mënyrë profesionale. Të angazhohen të gjitha strukturat në mënyrë të koordinuar.
Mënyra se si menaxhuam situatën në qarkun e Korçës duhet të na shërbejë edhe për këtë situatë, megjithëse sot kemi të bëjmë me një situatë më të gjerë”, tha Rama.
