Qytetarë, mos veproni në panik, situata është tejkaluar. Kështu u shpreh ministrja e Mbrojtjes, Olta Xhaçka, në mbledhjen e jashtëzakonshme të qeverisë, ndërsa ka bërë një përbledhje të situatës së krijuar pas tërmeteve që goditën Shqipërinë e mesme gjatë ditës së shtunë.
Xhaçka u shpreh se kemi qenë me shumë fat që dëmet janë të kufizuara, duke cilësuar lajm të mirë, faktin se s´ka pasur humbje jete.
“Ka pasur 105 qytetarë të lënduar, në pjesën dërrmuese këto lëndime kanë ardhur si pasojë e situatës së frikës.
Mund të themi që e keqja është tejkaluar. Dëmet janë më modeste nga ç’mund të kishin qenë.
Dëme ka pasur në qarqet më të prekura nga tërmetet, Tirana dhe Durrësi.
Në qarkun e Tiranës na rezulton se kemi një total me 293 banesa të dëmtuara, 20 pallate me krisje.
Për Durrësin kemi 185 banesa me dëmtime, 5 pallate me krisje. Për Elbasanin kemi 24 banesa, 3 pallate, 1 kabinë elektrike, 1 urë e varur në Polis.
Në Dibër rreth 17 banesa të dëmtuara, për Fierin 4 banesa të dëmtuara.
Puset e naftës janë të padëmtuara dhe kjo ka evituar një katastrofë më të madhe.
Për Lezhën kemi gjithsej 38 banesa dhe 2 pallate.
Në Vlorë 1 banesë e dëmtuar”, deklaroi ministrja Xhaçka.
