Me 7 vota pro dhe 2 kundër, Komisioni Hetimor i ngritur për shkarkimin e Presidentit Ilir Meta miratoi kërkesën për zgjatjen me dy muaj të punimeve. Kjo kërkesë tashmë do ti kalojë Kuvendit, për miratim në seancën e datës 3 tetor.
Komisioni Hetimor parlamentar diskutoi lidhur me zgjatjen e mandatit të këtij komisioni, por edhe për institucionet që duhet të thirren për të dëshmuar.
Ulsi Manja, kryetar i Komisionit Hetimor, tha se raporti i Komisionit të Venecias do të merret në shqyrtim në 11-12 tetor, ndërkohë që afati i hetimit parlamentar përfundon më 8 tetor.
Manja tha që të përfundojë hetimi parlamentar duhet që të shtyhet afati i Komisionit. Ai propozoi që afati i komisionit të shtyhet me dy muaj, pra deri më 8 dhjetor.
Por deputeti i opozitës së re, Adriatik Alimadhi, tha se nëse do të shtyhet afati i Komisionit Hetimor, atëherë duhet të thirren për të dhënë dëshmi edhe drejtuesit e institucioneve të tjera.
Por kjo kërkesë e Alimadhit është kundërshtuar nga Ulsi Manja dhe deputeti Alked Hyseni, sipas të cilëve komisioni ka miratuar planin e hetimit.
“Nëse do të shihet e arsyeshme që të thirren drejtuesit e institucioneve atëherë do të thirren, por ne kemi një plan hetimi të miratuar dhe do të ecim sipas atij plani”, thanë deputetët Manja dhe Hyseni, përfaqësues të PS-së.
Madje, deputeti Hyseni tha se Presidenti Meta është person nën hetim parlamentar dhe ishte i detyruar që të paraqitej para Komisionit për të dhënë shpjegimet e tij.
Por deputeti i opozitës së re, Halit Valteri tha se komisioni duhet të përfundojë mandatin brenda muajit tetor.
“Shtyrja e afatit të komisionit me 2, 3 apo 4 muaj, tregon seriozitetin e mazhorancës, për shkarkimin e Presidentit Ilir Meta. Unë mendoj se afati i komisionit duhet të zgjatet deri në fund të tetorit”, tha Valteri.
Mazhoranca socialiste, e mbështetur edhe nga deputetë të opozitës së re, kanë ngritur komisionin hetimor për shkarkimin e Ilir Metës nga posti i Presidentit, duke e akuzuar për shkelje të Kushtetutës dhe tejkalim kompetencash lidhur me anullimin e zhvillimitë të zgjedhjeve vendore në 30 qershor.
