Presidenti i Këshillit Evropian, Donald Tusk tha nga Tirana se “mendon që BE duhet ti çelë negociatat me Shqipërinë”. Deklaratën, Tusk e bëri gjatë një konference për mediat me kryeministrin Edi Rama nga kryeministria, pas një takimi mes të dyve.
“Medalja me e madhe do ishte çelja e negociatave me Shqipërinë”, tha Tusk pasi Rama i dha medaljen e “Yllit të Madh të Mirënjohjes”, për kontributin për hapjen e negociatave të Shqipërisë me BE. “Mund të them se në sajë të përpjekjeve tuaja i jemi afruar këtij objektivi, askush s’duhet të ketë dyshimin më të vogël as në Tiranë e as në kryeqytetet e BE. Në qershor, krerët e BE u angazhuan për të dhënë një vendim të qartë për çeljen e negociatave, po i afrohemi më shumë këtij momenti. Kam qenë i mendimit se be duhet ti çelë negociatat për Shqipërinë dhe Maqedoninë e Veriut në përputhje me rekomandimet”, deklaroi Tusk.
Kreu i Këshillit Evropian e vuri theksin te sundimi i ligjit si dhe marrëdhëniet e fqinjësisë së mirë.
“Në takimin e sotëm diskutuam rëndësinë që ka për Shqipërinë ruajta e historikut solid në lidhje me luftën kundër krimit të organizuar dhe korrupsionit, pra për sundimin e ligjit. Ky obsesion i BE me sundimin e ligjit, dhe madje do shtoja dy elementë të tjerë, marrëdhëniet e fqinjësisë së mirë dhe pajtimit është pjesë e ADS-së tonë dhe ka për të qenë edhe kur të bëheni shtet anëtar, përndryshe projekti europian s’do qëndronte dot në themele të forta. Po aq i rëndësishëm është edhe fakti se anëtarësimi i Shqipërisë dhe rajonit është në interesin më të mirë të Evropës pasi s’mund të ketë Evropë të sigurt dhe stabël pa integrimin e Ballkanit perëndimor në BE, se këtu bëhet fjalë për rëndësinë madhore të të ardhmes sonë të përbashkët dhe kjo do të thotë se ashkash s’po i bën askujt ndonjë nder”, u shpreh.
Po sot, Donald Tusk vizitoi dhe Maqedoninë e Veriut, nga ku i kërkoi BE-së të hapë negociatat me Maqedoninë.
