Analisti Mustafa Nano, i pozicionuar shpeshherë në krah të Qeverisë, duket se është entuziasmuar nga paraqitja e Presidentit Ilir Meta në Komisionin hetimor parlamentar.
Në studion e emisionit Opinion, Nano e cilësoi ngritjen e Komisionit Hetimor një veprim të gabuar që s’ka për t’u finalizuar.
“Performanca e Metës sot ka qenë fantastike, një nga xhestet më të mira që ka bërë ndonjë politikan shqiptar. Shkoi si zotëri i vërtetë, me qetësi dhe bëri sqarimet e veta në mënyrë perfekte dhe shumë të mirë.
E përsëris që performanca ishte fantastike”, tha Nano.
E vetmja kritikë e tij ndaj Metës ishte kollarja që kishte vendosur.
“Nuk ka Gjykatë Kushtetuese. E gjithë kjo do jetë një show politik. Ky ballafaqim, unë kisha frikë se mund të ishte starti i një konflikti të ri, por kjo iku. Meta ishte në gjithçka në rregull, siç i takon një Presidenti më përjashtim të kollares”, tha ai.
