Presidenti i Serbisë, Aleksander Vuçiç, ka zhvilluar ditë më parë, një vizitë në Washington ku është takuar me Sekretarin amerikan të Shtetit, Mike Pompeo.
Sikundër është raportuar Vuçiç dhe Pompeo kanë diskutuar lidhur me dialogun për normalizim të raporteve Prishtinë-Beograd dhe një marrëveshje finale.
Madje mediat kanë publikuar detaje, sikur në takim është biseduar për një marrëveshje finale ndërmjet dy shteteve që duhet të përfundojë me njohje reciproke, ndërkohë raportohet se Pompeo i ka bërë presion të madh Vuçiç që të njohë pavarësinë e Republikës së Kosovës.
Një gjë të tillë e ka pohuar edhe vetë Vuçiç pas kthimit nga Washington, duke paralajmëruar se Serbinë e pret një vjeshtë e dimër i vështirë.
Në një shkrim të sotëm, të gazetës “Informer”, thuhet se Trump do t’i dhurojë Serbisë një shumë prej 10 miliardë dollarëve, 14 aeroplan luftarak të llojit F-16 dhe anëtarësimin ne Bashkimin Evropian deri në vitin 2024.
Gazeta i referohet burimeve, i cili pretendon se Trump është i vendosur që të zgjidh problemin Kosovë-Serbi deri në mesin e 2020-ës.
“Trump ka dalë me këtë ide për t’i ofruar Serbisë një plan të ngjashëm sikurse “Plani Marashall” që i ishte ofruar Gjermanisë pas Luftës së Dytë Botërore. Kjo do të përfshinte investime deri në 10 miliardë dollarë në projekte të infrastrukturës, të paktën 14 avionë luftarak të tipit F-16, dhe gjithashtu do të përshpejtonte integrimin në Bashkimin Evropian. Kjo do të thotë që Serbia do të futet në BE më së largu deri në 2024”, ka thënë ky burim në kushtet anonimiteti për Informer.
Sipas artikullit, një ofertë të tillë, SHBA, do e sillte në Serbi, përmes përfaqësuesit special për Ballkanin Perëndimor, të sapoemëruarit, Matthew Palmer.
Thuhet që përveç prezantimit të ofertës, Palmer do të ketë për detyrë që të bind palën serbe të pranojë një ‘ofertë’ të tillë.
