Presidenti Ilir Meta do të thirret javën e ardhshme në mbledhjen e Komisionit Hetimor që mazhoranca ka ngritur për hetimin e tij.
Meta do të thirret për t’u pyetur rreth dekretit të tij për zhdekretimin e zgjedhjeve të 30 qershorit, ndërsa ftesa për tu paraqitur i ka shkuar edhe në rrugë zyrtare.
Kuvendi ngriti Komisionin Hetimor për shkarkimin e Presidentit të Republikës më 8 korrik, duke i lënë afat deri në 8 Tetor të vlerësojë nëse Ilir Meta e ka shkelur apo jo Kushtetutën.
Komisioni drejtohet nga Ulsi Manja i cili është edhe kryetar i Komisionit të Ligjeve. Ndërsa në total janë nëntë anëtarë, 5 nga mazhoranca dhe 4 nga e ashtuquajtura opozitë.
Paraditen e sotme, presidenti i Republikës Ilir Meta, përmes një postimi në Facebook, deklaroi publikisht se do ti përgjigjej pozitivisht ftesës së Komisionit Hetimor.
“Të dashur miqtë e mi gazetarë,
Më “çmendët” me sms tuaja, si asnjëherë tjetër!
Po ç’është kjo pyetje kaq absurde që më bëni të gjithë: A do shkoj tek Parlamenti?!
Së pari, Presidentit si Kryetar i Shtetit, i takon të jetë shembull i bashkëpunimit institucional. Dhe besoj se në këto dy vite kam bërë gjithçka për të vendosur këtë bashkëpunim, në respekt të plotë të Kushtetutës, shtetit ligjor dhe interesit publik.
Së dyti, unë mezi pres të kthehem tek Parlamenti”, do të shkruante kreu i shtetit.
