Proces të montuar politikisht e ka cilësuar atë kundër ish-deputetit Ervin Salianji dhe gazetarit Jetmir Olldashi, Sekretari i Përgjithshëm i PD-së, Gazmend Bardhi.
Ky i fundit ishte i pranishëm në seancën gjyqësore, ku u pyet lidhur me denoncimin e skandalit që njihet si “Babalja”, por që rezulton i përfshirë Geron Xhafaj, vëllai i ish-ministrit të Brendshëm, Fatmir Xhafaj.
Bardhi akuzoi prokurorinë se po vijon të përdoret politikisht duke marrë të pandehurin gazetarin që zbuloi skandalin dhe ish-deputetin, ndërsa mbron vëllain e Fatmir Xhafajt.
“Ky proces që po bëhet është i montuar politikisht ndaj denoncuesve dhe përfaqësuesve të opozitës që denoncuan këtë rast, të intimidojnë përfaqësuesit e opozitës për të mos denoncuar krimet që përfshijnë individë me lidhje të forta politike, ndërkohë që në thelb të punës së organit të prokurorisë është garantimi i pandëshkueshmërisë për personat që gëzojnë mbështetje politike”, tha Bardhi.
Zyrtari i PD ka mohuar të ketë takuar Fredi Alizotin, duke shtuar se i gjithë skandali u zbulua si rezultat i punës investigative të gazetarit.
