Është një nga fenomenet më të përhapura në vend. Prej vitesh nuk po gjen zgjidhje. Fëmijë që shfrytëzohen për qëllime ekonomike në rrugë dhe në vende të tjera. Mijëra euro janë hedhur nga qeveritë për shoqatat e ndryshme, bashkitë dhe Ministrinë e Mirqënies Sociale. Por përveç faktit se fondet janë zhdukur pa lënë gjurmë, gjendja në rrugë mbetet e njëjtë.
Sot ministrja e Shëndetësisë dhe Mirqënies Sociale, Ogerta Manastirliu, pranoi fenomenin, por sipas saj fajin e kanë bashkitë, të cilat nuk kanë bërë aq sa duhet për këtë kategori.
Në mbledhjen e Këshillit Kombëtar ajo tha:
“Plani Kombëtar 2019-2021 për Mbrojtjen e Fëmijëve në shfrytëzim ekonomik dhe situatë rruge i mbështetur nga OSBE që miratojmë sot do të jetë i hapur për rekomandime para se ta depozitojmë në Kuvend. Janë 265 masa dhe 75 tregues për realizimin e objektivave në mbrojtje të drejtave të fëmijëve. Të jemi bashkë për të ndërtuar një ndërhyrje strategjike që të mos kemi përsëritje të fenomenit të shfrytëzimit të fëmijëve. Duhet ndërhyrë në zemër të problemit, për të zbuluar shkakun pse ndodh ky fenomen. Një tjetër pikë që e konsideroj me rëndësi është eliminimi i të gjitha formave të dhunës ndaj fëmijëve. Është detyrë e të gjitha Bashkive për t’u angazhuar drejtpërdrejt për të luftuar këtë fenomen dhe menaxhuar rastet. Në kuadër të Fondit Social qeveria do të mbështesë bashkitë për të ngritur shërbime të reja sociale, pasi ato të kenë miratuar Planet Sociale duke na dhënë një panoramë të qartë të nevojave për shërbime të reja sociale” – tha ministrja.
