Drejtori për Europën Qendrore dhe Jugore në Departamentin e Shtetit të SHBA, David Kostelancik, nis sot takimet zyrtare me drejtuesit më të lartë politik në vend.
Axhenda e takimeve të zyrtarit të DASH nis në orën 11:00 në Kryesinë e Kuvendit, me kryeparlamentarin Gramoz Ruçi, për të vijuar në orën 14:00 me kreun demokrat Lulzim Basha.
Në vijim, Kostelancik, do të takohet në orën 15:30 me kryetaren e LSI-së, Monika Kryemadhi, për të pasuar me kryeministrin Edi Rama në orën 17:00.
Në fokus të takimeve pritet të jetë kriza politike në vend, ecuria e reformave, veçanërisht ajo në drejtësi, si dhe negociatat me BE-në, për të cilat Shqipëria pret të marrë një datë më 18 tetor.
Nuk dihet nëse zyrtari i DASH do të tentojë të ulë palët në një marrëveshje për gjetjen e një zgjidhjeje mbi krizën politike në vend, apo do të dëgjojë interpretimet e secilës palë, pa tentuar në gjetjen e një rruge që do t’i japë fund krizës.
Kostelancik ka qenë pjesë e stafit të ambasadës amerikane në Tiranë, çka do të thotë se ai njeh jo pak mjedisin politik shqiptar. Kjo ndoshta mund t’a ndihmojë zyrtarin e DASH që të ketë më pak vështirësi në gjetjen e një rruge për zgjidhjen e krizës, nëse do të marrë një mision për të ndërmjetësuar palët.
