Një ditë pas publikimit të investigimit nga “Fiks Fare” ku dy avokat morën katër mijë euro në emër të prokurorëve, ka reaguar edhe Prokuroria e Përgjithshme.
Nëpërmjet një shkrese, zyra e Prokurorit të Përgjithshëm i ka dërguar prokurorisë së Krimeve të Rënda kërkesë për të nisur hetimet ndaj prokurorëve dhe avokatëve të përfshirë në këtë investigim.
Në shkresë thuhet se:
“Ju dërgojmë për vlerësim ligjor të elementëve të veprës penale, publikimet e fundit të programit investigative ‘Fiks Fare’, datë 02. 09. 2019, ku dyshohet ndërhyrja e pa ligjshme e avokatëve tek prokurorët e çështjes për mbylljen e procedimeve penale, kundrejt dhënies së shumës së parave”.
Për javë me radhë, qytetari kërkoi nga avokatët dhe prokuroria e Vlorës të njihej me dosjet. Por kërkesat e tij u rrëzuan pasi aktet u cilësuan sekrete.
Ndërkohë sipas emisionit Fiks Fare çështja e arrestimit të shtetasit K.A. më datën 24.08.2019 është hetuar nga dy prokurorë në Vlorë.
Dosja me numër 1453 që bënte fjalë për sekuestrimin e 1.3 gramë kokainë është hetuar nga prokurori Aurel Zarka.
Dosja me numër 1501 që bën fjalë për vjedhje është hetuar nga prokurori Kledjan Llaho.
Pikërisht këta dy prokurorë do të jenë në sitën e prokurorisë së Krimeve të Rënda së bashku me avokatët Baftjar Rusi dhe Vladimir Sadikaj.
https://www.youtube.com/watch?v=Pi9UtaYeB2Y&feature=youtu.be&app=desktop
Në investigim rezultoi se vetëm dy javë pasi avokatët i morën këstin e fundit prej 1000 eurosh me qëllim që t’ua jepni prokurorëve të çështjes, prokuroria e Vlorës pezulloi hetimet.
