Opozita i ka dorëzuar OSBE/ODIHR një raport me prova konkrete lidhur me parregullsitë e evidentuara prej saj për votimet e 30 qershorit.
Ndërsa e cilëson procesin si jokushtetues dhe anti-ligjor, për shkak se Presidenti Ilir Meta ka anuluar 30 qershorin si datën për mbajtjen e zgjedhjeve lokale, opozita ka mbledhur prova dhe fakte mbi parregullsitë e evidentuara.
Ivi Kaso, përfaqësues ligjor i PD-së në KQZ, ka pohuar se raporti përmban të dhëna konkrete mbi atë se çfarë ka ndodhur.
Nard Ndoka, kreu i PDK-së, dhe Fatmir Mediu nga PR, gjithashtu konfirmojnë hartimin e një raporti të plotë që evidenton të gjitha shkeljet, përfshi këtu edhe manipulimin e përqindjes së pjesëmarrjes në votime, edhe pse kandidatët e Rilindjes garonin të vetëm, pra pa kandidatë alternativë.
Mësohet se raporti përfshin fakte dhe prova mbi votimet në grup, presionet ndaj administratës për të marrë pjesë në proces dhe votuar hapur pro emrave të kandiduar nga Rilindja për kryebashkiakë, fotografimin e votës, votimin në emër të personave që s’kanë marrë pjesë në proces, apo atyre që rezultojnë të jenë jashtë vendit.
Sipas opozitës pjesa më e madhe e fakteve dhe provave që përfshihen në raportin që i është dërguar OSBE/ODIHR nuk janë publikuar deri më tani.
