Në rajonin në të cilin ka ndodhur sulmi me kamion, nga i cili mbetën të vdekur së paku 84 persona dhe qindra të tjerë u lënduan, jetojnë edhe shqiptarë por ende nuk ka informacione nëse ka të lënduar apo të vdekur.
Ministria e Punëve të Jashtme të Shqipërisë ka dënuar me forcë sulmin terrorist, ndërsa vë në dispozicion numrin e ambasadës shqiptare në Francë për çdo shtetas shqiptar.
“Ministria e Punëve te Jashtme dënon me forcë sulmin e rëndë terrorist të ndodhur dje në Francë dhe shpreh solidaritetin dhe ngushëllimet për popullin dhe autoritetet franceze ne këtë moment te vështirë. Qëndrojmë krah të Francës ne betejën kundër terrorizmit dhe dhunës ekstreme. Ministria e Punëve te Jashtme dëshiron të informojë opinionin publik se ka marrë të gjitha masat e nevojshme për t’i ardhur në ndihmë shtetasve shqiptarë që mund të jenë të përfshirë në këtë situate krize. Nga informacionet e deritanishme te përcjella nga Ambasada jonë në Paris nuk rezulton të kemi shtetas shqiptarë që mund të kenë humbur jetën. Në ndihmë të qytetarëve tanë që ndodhen në Francë dhe familjeve të tyre Ambasada shqiptare në Paris vë në dispozicion nr e kontaktit: +33147233151. Ministria e Punëve te Jashtme do te informoj ne vijimësi opinionin publik për zhvillime te mëtejshme”, deklaron MPJ.
MPJ KOSOVË
Ndërkaq edhe ambasada e Kosovës në Francë vë në dispozicion numrin e telefonit për shtetasit e saj,. Ambasadori i Kosovës në Francë, Qëndrim Gashin, ka thënë se janë duke ndjekur nga afër situatën. “Po e monitorojmë situatën. Për deklarime ju lutem i drejtoheni MPJ-së”, ka thënë Gashi sot në orët e para të mëngjesit. Ambasadori Gashi ka dhënë një numër emergjent për kosovarët që kanë nevojë për ndihmë, pas sulmit në Nice të Francës. Numri emergjent është: +33 6 03 33 03 18.
