Bashkimi Europian duhet të japë një sinjal të fuqishëm në tetor se sa seriozë jemi ne në procesin e zgjerimit. Shqipërisë dhe Maqedonisë së Veriut duhet t’i jepet një datë për hapjen e negociatave. Deklarata është bërë nga ministri i Jashtëm i Sllovakisë, Miroslav Lajçak, i cili gjithashtu është kryesuesi i rradhës së OSBE.
“Shpresojmë të ketë një ftesë sepse do të kishte pasoja serioze për të ardhmen e procesit të zgjerimit”, tha Lajçak.
Deklaratat e kreut të diplomacisë së Sllovakisë u bënë në takimin informal të ministrave të Punëve të Jashtme të Bashkimit Evropian dhe të vendeve të Ballkanit Perëndimor, ku merr pjesë edhe ministri në detyrë për Evropën dhe Punët e Jashtme, Gent Cakaj.
Ministrat pritet të trajtojnë tema të nxitjes së bashkëpunimit rajonal në fusha të interesit të përbashkët. Ndër to, në diskutim janë çështjet e axhendës evropiane e të rajonit, nismat në kuadër të procesit të Berlinit apo transheve të tjera paralele rajonale, të cilat kanë si objektiv zgjerimin e Bashkimit Evropian.
