Banka e nivelit të dytë, e cila ndodhet në qendër të qytetit të Vlorës është grabitur tre herë.
Edhe pse ndodhet në mes të qytetit dhe në një vend që hapur, autorët nuk e kanë pasur të vështirë që të planifikojnë grabitjet dhe t’i realizojnë ato.
Në rastin më të rëndë është plagosur rëndë edhe polici privat, pasi tentoi të bllokonte grabitësit.
Në gusht të vitit 2011, autorët vepruan në mesditë për të kryer planin e tyre. Në atë kohë, tre persona të maskuar e të armatosur, pasi kanë lënë mjetin e tyre pa targa para bankës, i janë drejtuar derës së saj.
Roja private ka ndërhyrë për të mos i lejuar, por ndaj tij kanë përdorur dhunë duke e qëlluar brutalisht, duke e neutralizuar atë e më pas i kanë marrë armën.
Madje, autorët qëlluan në ajër për të trembur punonjësit që të mos i ndalonin. Në atë kohë, përfaqësuesit e bankës thanë se shuma e grabitur ishte e papërfillshme.
Sipas skemës së ndjekur nga autorët, të cilët veprojnë në kulmin e ditës, ka dyshime se ata mund të jenë të njëjtët. Nga ana e policisë janë shoqëruar dhjetëra persona, mes të cilëve janë kryesisht dëshmitarë të grabitjes ose persona me precedentë penalë në fushën e grabitjes. Edhe pse shuma konsiderohet e madhe, pas grabitjes nuk ka pasur asnjë reagim nga banka e grabitur, për të konfirmuar shumën e marrë nga autorët.
