Cigaret elektronike dhe pajisjet e ndryshme që janë shpikur për të eliminuar përdorimin e duhanit, duket se kanë nisur të shfaqin edhe efektet e para anësore. Sipas një raporti të nxjerrë nga Qendra për Kontrollin dhe Parandalimin e Sëmundjeve në Shtetet e Bashkuara të Amerikës, mësohet se deri më tani janë nën studim rreth 153 raste të mundshme, të prekurë nga një sëmundje misterioze e mushkërive që duket se shkaktohet nga përdorimi i cigareve elektronike. Agjensia njofton se sëmundja po hetohet në të njëjtën kohë në 16 shtete ku rastet u raportuan nga 28 qershori deri në 20 gusht të këtij viti.
Sic raportohet edhe nga mjekët, sëmundja fillon gradualisht me simptoma që përfshijnë vështirësi në frymëmarrje, gulçim ose dhimbje në gjoks. Disa raste gjithashtu nuk kanë përjashtuar edhe simptoma të një gjendjeje të moderuar gastrointestinale, duke shkaktuar të vjella, diarre dhe lodhje. Deri më tani nuk janë shënuar viktima nga kjo sëmundje ‘anonime’ por pritet që rastet e të prekurve të shtohen. Edhe pse mjekët dhe shkencëtarët nuk kanë gjetur ende një shpjegim shkencor lidhur me këtë sëmundje të re që po qarkullon, mësohet se të gjithë pacientët kanë pohuar se janë përdorues të cigareve elektronike. Ata gjithashtu shtojnë se disa prej tyre janë edhe konsumues të lëndëve narkotike, pasi nga analizat e bëra ata rezultojnë se janë mbartës të një substance të quajtur tetrahidrocannabinol, e cila ndodhet tek marijuana apo edhe prodhime të tjera me përbërje hashashi.
Agjencia e Shëndetit ka përjashtuar rastin e ndonjë viroze infektive edhe pse mjekët janë ende në stadin e studimit dhe ekzaminimit të sëmundjes. Agjencia që ka marrë përsipër studimin e kësaj sëmundjeje ka analizuar me kujdes ecurinë e pacientëve duke i pyetur specifikisht se cfarë lloj cigareje elektrike kishin përdorur, sa kohë kishin që e konsumonin dhe cilat kanë qenë simptomat e tyre përpara se të nisnin konsumimin e saj. Administrata e Ushqimit dhe Barnave po heton gjithashtu cigaret elektronike dhe cdo prodhim të tyre duke i bërë thirrje konsumatorëve të raportojnë menjëherë nëse kanë shqetësime të kësaj natyre.
Pjesa më e madhe e përdoruesëve duket se janë adoleshentë apo edhe të rinj të cilët sapo kanë nisur përdorimin e duhanit përmes cigareve elektronike. Sipas statistikave, përdorimi i cigareve elektronike mes shkollave të mesme u rrit me 78 përqind midis 2017 dhe 2018, me më shumë se 27 përqind të shkollave të mesme përdorin rregullisht cigare elektronike.
Edhe në vendin tonë është shënuar një rritje e përdoruesëve të cigareve elektronike por për cilësinë dhe sigurinë e tyre nuk ka ende një version zyrtar.
Burimi: https://www.theverge.com
