Prokurorja speciale në Maqedoninë e Veriut, Katica Janeva, para pak çastesh, është shoqëruar në polici, nga banesa e saj në lagjen, Kozle të Shkupit.
Forcat e shumta policore kanë rrethuar hyrje daljet e shtëpisë dhe më pas janë futur brenda, për ta shoqëruar në polici prokuroren Janeva.
Prokurorja speciale, Katica Janeva të martën ka dëshmuar para Prokurorisë lidhur me rastin “Zhvatja”, që lidhet me marrjen e 1.5 milion euro të një afaristi, nga dy persona të afërt me kreun e speciales.
Janeva, bazuar në një video-inicizim të publikuar nga gazeta italiane “La Verita” dyshohet të jetë përfshirë në këtë skandal.
Bojan Jovanovski dhe Zoran Mileski dy personat që shihen në incizim duke marrë paratë, i premtojnë afarstit, Orce Kamçev se në bashkëpunim me Katica Janevën do t’i lehtësojnë atij procesin gjyqësor në një aferë tjetër korruptive.
Jo zyrtarisht, siç mëson Alsat, janë arrestuar edhe 3 persona tjerë, mes të cilëve janë edhe dy politikanë.
Policia javë më parë ka bastisur banesën e kryeprokurores së dorëhequr, Katica Janeva, të cilës i është marr celulari për shkak të dyshimeve për lidhshmëri mes drejtuesin e televizionit 1 TV, Bojan Jovanovski dhe një afaristi tjerë, Zoran Milevski, të cilët janë paraburgosur pas denoncimeve se kanë marrë 1.5 milion euro nga një afarist Orce Kamçev, duke i premtuar masa lehtësuese, apo edhe lirim nga akuzat në procesin gjyqësor që po zhvillohen kundër tij.
Katica Janeva, në postin e prokurores speciale ishte emëruar më 15 shtator të vitit 2015, me mbështetje edhe të opozitës, ndërsa qëllimi kryesor i punës së saj ishte hetimi i aferës së përgjimeve, që ishte publikuar në shkurt të 2015-ës nga lideri i atëhershëm i opozitës, Zoran Zaev, tani kryeministër i Maqedonisë së Veriut. Gjatë kësaj periudhe, Prokuroria Speciale ka ngritur 17 padi penale kundër 94 personave, përfshirë edhe ndaj ish-kryeministrit Nikolla Gruevski, i arratisur në Hungari, për t’i ikur vuajtjes së dënimit prej dy vjet burgim.
