Nga Boldnews.al
Ndërsa Mihal Kokëdhima qëndron në dhomat e paraburgimit, me lot në sy është informuar se lokali i tij i famshmi “Panorma”, i ndërtuar pa leje dhe (Pa norma) sot u prish, që në mëngjes herët. I thonë “derr shteti” këtij tonit, nuk të lë të livadhisësh, për më shumë se Kokëdhima u kap me pamje mbi kofanon e një furgoni ku po sulmonte pesë turistë spanjollë dhe dy shoqëruesit shqiptarë.
Kjo u konsiderua si ngjarje e rëndë nga qeveria, që pasi hëngri dreka e darka në lokalin pa leje të Kokëdhimës dhe mbi të gjithë ngritur mu në buzën e detit, sot i dërguan fadromat. Dy orë punë dhe në fund 2 mijë metra katrorë ndërtim u bë një pirg inertesh me bregun e detit.
“Inspektorati Kombëtar i Mbrojtjes së Territorit ka vendosur të prishë bar-restorantin “Panorma” në Porto-Palermo, i ekspozuar publikisht pas një skandali të pronarit me disa turistë spanjollë dhe dy shoqëruesit e tyre shqiptarë. Objekti rreth 2 mijë metër katror, i ndërtuar në një nga zonat më të bukura bregdetare të Shqipërisë, rezulton pa leje, ndërkohë që shfrytëzonte kundrejt pagesës edhe pjesën e plazhit.”- shkruhet në njoftimin e IKMT-së.
U desh kjo video për të kujtuar inspektoratin se lokali ishte pa leje? Për më shumë, kjo “dorë letrare” që shkroi njoftimin e Inspektoratit Kombëtar të Mbrojtjes së Territorit, shprehet “në një nga zonat më të bukura bregdetare”, ndërkohë që ata janë zyrtarët që duhet të flasin me akte, shkresa, konstatime dhe në fund të shkatërrojnë çdo objekt, të ndërtuar pa leje. Por Mihali i partisë kishte pushtet, ai u trash nga zullumi që e nisi që me ngritjen e objektit pa leje. Fryhej me këdo që shililte si klient në atë bar-restorant se ishte njeri i pushtetshëm dhe njihte të medhnjtë, duke përfshirë edhe atë të madhin fare, Edi Ramën.
Madje edhe në seancën e masës së sigurisë pas arrestimit për incidentin e rëndë me turistët spanjollë Mihal Kokëdhima i tha avokatit se: njoh Edi Ramën, e kam mik”. As kjo deklaratë e një të padituri nuk e shpëtoi, pasi vendimi ishte marrë që në momentin që Mihali i partisë i prishi imazhin qeverisë.
Gjithçka qesharake dhe Mihalin e shitën, sepse ata “dreq turistësh” i bënë një video ku ai mundohej ti sulmonte, vetëm se u larguan nga lokali i tij për shkak se nuk u pëlqeu shërbimi. Dhe Ramës po i preke imazhin, po ja ndyve propagandën bëhet bishë, të tregon ligjin, të nxjerr stërdhëmbëshin e pushtetit dhe të ndez matrapikun që të shkul nga vendi.
Ashtu ndodhi që në më pak se dy orë lokali që prej gjashtë vitesh rrinte si “pushtues deti” në Porto Palermo sot nuk ekziston më. Mihali është në burg, lokali iu prish dhe kryeministri do ketë me çfarë të merret pasditen e sotme në facebook, për ta shitur këtë nismë si “forcën e shtetit ligjor”.
Për kaq pak Mihalit i iku gjithë ai investim, i mbushi mendjen vetes se kishte mik Ramën dhe nuk e prekte kush, por kur prek mikun në prishje imazhi, ai e bën armik. Fundja e ka treguar në një moment sinqeriteti kur shprehet se për çështje të tilla nuk pyet as për vëllanë e tij.
