Pas takimit që pati me ish kryeministrit Sali Berisha, Ambasadori amerikan Donald Lu i është drejtuar zyrës së kryetarit të PD Lulzim Basha. Këto takime të shpejta vijnë pas përgjigjes negative që i dha PD -ja propozimit të SHBA -së për reformën në drejtësi.
Fokusi i takimit mbetet sigurisht qëndrimi i opozitës për votimin e reformës në drejtësi. Në një reagim për mediat pasi mori përgjigjen e PDsë, ambasadori Donald Lu është shprehur i zhgënjyer nga kryetari Basha.
“Z. Basha propozoi diçka që ai vetë ka pranuar se është në konflikt interesi dhe jo në përputhje me paragrafin 61 të Opinionit Përfundimtar të Komisionit të Venecias”, thuhet në reagimin e Lu.
Teksa ka theksuar: “Jemi duke vazhduar bisedën me të dyja palët në përpjekje për t’i sjellë përsëri tek mbështetja për propozimin hibrid diskutuar nga NdihmësSekretarja Nuland të dielën”.
Në mbledhjen me dyer të mbyllura të grupit parlamentar demokrat ka pasur debate të forta në lidhje me përgjigjen që i është kthyer SHBA -së. Nga kjo mbljedhje është larguar deputeti Sali Berisha që mesa duket priste ambasadorin amerikan i cili i ka shkuar në zyrë në kohën që ende mbahej mbledhja e grupit të demokratëve.
