Prokuroria e Përgjithshme ka sqaruar sot procedurat që ka ndjekur lidhur me verifikimin e Valdrin Pjetrit, kandidatit të Rilindjes për Shkodrën, i cili u tërhoq nga marrja e detyrës së kryebashkiak, pas publikimit të dokumenteve që provojnë dënimin e tij në Itali me 18 muaj burg.
Dokumentet u publikuan nga Partia Demokratike, sipas të cilës Pjetri është dënuar me vendim të formës së prerë nga Gjykata e Firences në vitin 2003.
Opozita iu drejtua prokurorisë për të verifikuar Pjetrin në kuadër të ligjit për dekriminalizimin, ndërsa kërkoi gjithashtu nga Prokuroria e Krimeve të Rënda që të veprojë ligji anti-mafia mbi pasuritë e tij.
Ndërkohë prokuroria, përmes një shkrese informuese drejtuar PD-së, sqaron procedurat e ndjekura prej pas, pas akuzave se me urdhër të Edi Ramës, po bllokohej procesi i hetimit për Pjetrin.
“Në vijim të kësaj procedure, më datë 14.08.2019, Prokuroria e Përgjithshme ka përcjellë pranë Ministrisë së Drejtësisë kërkesën për ndihmë juridike për subjektin Valdrin Pjetri, duke bashkëngjitur të dhënat kriminale të dënimit penal në shtetin italian, të vëna në dispozicion me shkresën tuaj”, thuhet në përgjigjen e Prokurorisë.
Po ashtu prokuroria sqaron se ka marrë nga Komisioni Qëndror i Zgjedhjeve formularin e vetë-deklarimit të Valdrin Pjetrit dhe ka kërkuar verifikime nga Zyra e Gjendjes Gjyqësore, Drejtoria e Përgjithshme e Gjendjes Civile, Policia dhe prokuroritë e të gjitha niveleve.
Sipas prokurorisë, Valdrin Pjetrit një javë më parë i është kërkuar të depozitojë edhe gjurmët e gishtërinjve. pranë Institutit të Policisë Shkencore.
