Prokuroria e Përgjithshme i është përgjigjur akuzave të PD lidhur me hetimet ndaj Valdrin Pjetrit, kandidatit të Rilindjes për Bashkinë e Shkodrës.
Pjetri, sipas dokumenteve që ka publikuar PD, rezulton i dënuar me vendim të formës së prerë nga drejtësia Italiane, më konkretisht nga Gjykata e Firences në vitin 2003 me akuzën e shpërndarjes së drogës.
Në kushte të tilla, referuar ligjit të dekriminalizimit, Pjetri nuk mund të kandidonte për kryebashkiak, ose deputet, duke qenë subjekt i këtij ligji.
Fakti që nuk e ka deklaruar dënimin, rëndon pozitën ligjore të Pjetrit, ndaj të cilit prokuroria, ashtu si edhe në raste të ngjashme, si p.sh ish-kryebashkiaku i Kavajës, Ervis Roshi, hetohet për fallsifikim formularësh, nëse provohet vërtetësia e dënimit të tij.
Prokuroria e Përgjithshme sot ka sqaruar procedurat e ndjekura, duke pohuar se ka nisur hetimet prej datës 6 gusht, ndërsa ka kërkuar informacione nga Zyra e Gjendjes Gjyqësore, por edhe nga Policia e Shtetit.
Gjithashtu prokuroria sqaron se Pjetrit i është kërkuar të depozitojë edhe shenjat e gishtërinjve, një procedurë kjo e ndjekur edhe më parë me ish-deputetë dhe ish-kryebashkiakë, subjekt i ligjit të dekriminalizimit.
PD ka akuzuar prokurorinë, se me urdhër të Edi Ramës, nuk po zbaton ligjin për dekriminalizimin. Një ditë më parë, PD i bëri thirrje Prokurorisë që të zbatojë ligjin anti-mafia, referuar pasurive të Valdrin Pjetrit.
Reagimi i Prokurorisë
Lënda: Kthim përgjigje
SEKRETARIT TË PËRGJITHSHËM TË PARTISË DEMOKRATIKE Z. Gazmend BARDHI
Në përgjigje të kërkesës suaj nr. 121/2 prot., datë 13 gusht 2019, mbi proçedurën e verifikimit të subjektit Valdrin Pjetri, kandidat për Kryetar të Bashkisë Shkodër, ju informojmë se:
Më datë 05.08.2019, Prokuroria e Përgjithshme ka regjistruar kërkesën tuaj për verifikim të detajuar të subjektit Valdrin Pjetri, në zbatim të ligjit Nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”. Brenda njëzetekatër orëve, ka filluar procedura e verifikimit.
Më datë 06.08.2019, me administrimin e formularit të vetëdeklarimit të subjektit Valdrin Pjetri prej Komisionit Qendror të Zgjedhjeve, Prokurori i Përgjithshëm ka filluar procesin e verifikimit të plotë e të gjithanshëm brenda dhe jashtë territorit të Shqipërisë. Konkretisht:
Më datë 06.08.2019, i është dërguar shkresa për verifikim Zyrës së Gjendjes Gjyqësore, Drejtorisë së Përgjithshme të Gjendjes Civile, Drejtorisë së Policisë së Shtetit, organeve të prokurorisë (prokurorive pranë gjykatës së shkallës së parë, prokurorive pranë gjykatës së apelit, Prokurorisë pranë Gjykatës së Shkallës së Parë për Krime të Rënda).
Më datë 09.08.2019, shtetasit Valdrin Pjetri i është kërkuar të depozitojë gjurmët e tij daktiloskopike pranë Institutit të Policisë Shkencore.
Për sa i përket proçedurës së verifikimit jashtë territorit të Shqipërisë, më datë 06.08.2019, Prokuroria e Përgjithshme ka dërguar pranë Drejtorisë së Bashkëpunimit dhe Koordinimit Ndërkombëtar pranë Drejtorisë së Policisë së Shtetit, si dhe pranë Ministrisë së Drejtësisë kërkesën për verifikim të mëtejshëm nga autoritetet e drejtësisë italiane, duke iu kërkuar këtyre të fundit vënia në dispozicion e çdo lloji vendimi penal të dhënë nga gjykata, vendim për masa sigurimi personale apo vendime dëbimi, në emër të shtetasit Valdrin Pjetri.
Në vijim të kësaj proçedure, më datë 14.08.2019, Prokuroria e Përgjithshme ka përcjellë pranë Ministrisë së Drejtësisë kërkesën për ndihmë juridike për subjektin Valdrin Pjetri, duke bashkëngjitur të dhënat kriminale të dënimit penal në shtetin italian, të vëna në dispozicion me shkresën tuaj nr. 121/2 prot., datë 13 gusht 2019.
Për sa më sipër ju sqarojmë, se në zbatim të afateve të parashikuara në Kreun 5, pika 9, të Vendimit nr 17, të Kuvendit të Shqipërisë “Për përcaktimin e rregullave të detajuara mbi zbatimin e ndalimeve të parashikuara në ligjin nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike” do t’ju komunikojmë rezultatin e verifikimit.
Duke ju falënderuar për bashkëpunimin,
PROKURORI I PËRGJITHSHËM
ARTA MARKU
Në mungesë dhe me urdhër
Drejtor i Drejtorisë së Marrëdhënieve Juridiksionale me Jashtë
dhe e Verifikimit të Integritetit të Personave që Zgjidhen
Emërohen ose Ushtrojnë Funksione Publike
