Kryeministri Rama ka reaguar sërish në lidhje me Valdrin Pjetri. kryebashkiakun e Shkodrës të dalë nga “30 qershori” për fshehjen e dënimit në Itali.
Rama shprehet se Pjetri nuk është kriminel pasi ka qenë korrekt si nëpunës në administratë qysh në kohën e qeverisjes së PD por fshehja e ngjarjes është e patolerueshmenë.
Ai ia ka lënë të gjithë fajin Pjetrit, pavarësisht se ishte i zgjedhuri i tij duke shkruar se përgjegjësia individuale s’mund të ketë më asnjë fije kosto kolektive.
Postimi i plotë:
Valdrin Pjetri nuk është kriminel! Ai ka shërbyer në administratë si nëpunës korrekt qysh në kohën e qeverisjes së PD. Çfarëdo të ketë bërë 19 vjeç nuk e bën kurrësesi njeriun një kriminel! Por fshehja e ngjarjes është e patolerueshme dhe pasojat për Shkodrën të pajustifikueshme!
Partitë nuk verifikojnë dot të dhëna individuale jashtë afateve të përcaktuara nga shtetet për dëshminë e penalitetit. Ato merren vetëm me kërkesë nga policia ose prokuroria. Koha të fusim në ligj afate verifikimi shtetëror të kandidaturave para regjistrimit të tyre në zgjedhje!
Një kandidat që gënjen në mirëbesim dhe në formularin e vetëdeklarimit s’mund të lerë në baltë zgjedhësit dhe partinë që e ka besuar. Ai duhet të përjashtohet nga gara pa mundur të regjistrohet në zgjedhje dhe ta marrë të plotë gjithë përgjegjësinë e vetëdeklarimit të rremë.
Jo vetëm kaq, po është koha të nisë verifikimi shtetëror i të gjitha vetëdeklarimeve të politikanëve e punonjësve të shtetit që kanë firmosur. Çdo vetëdeklarim i rremë duhet të sjellë përjashtim dhe dënim penal.Përgjegjësia individuale s’mund të ketë më asnjë fije kosto kolektive.
