Mund të kishte qenë një natë e paharrueshme dhe argëtuese për Chelsea-n dhe Jorginho-n, por Superkupa e Europës e luajtur kundër Liverpool-it ka patur një fund të hidhur për londinezët. Lotaria e penalltive ka ndëshkuar “Blutë”, duke i detyruar të largohen kokulur nga Stambolli.
Gjithsesi, një ngushëllim i vogël për ish-mesfushorin e Napoli-t, të cilit ia kanë shkruar gabim emrin në fanellë, ka qenë realizimi i golit të barazimit 2-2 në kohës shtesë.
Dhe ka qenë pikërisht goli i shënuar me penallti nga lojtari i Chelsea-t që është festuar në profilin zyrtar të UEFA-s në Twitter. Në fakt, Jorginho ka thyer mallkimin që kishte goditur futbollistët italianë që nga 2007-ta në këtë kompeticion.
I fundit që ka shënuar në Superkupën e Europës ka qenë Filippo Inzaghi, në ndeshjen e fituar 3-1 nga Milan-i kundër Sevilla-s. Jorginho e ka thyer këtë tabu dhe mund të ndihet më pak i hidhëruar për humbjen e pësuar.
