Përfshihet nga flakët magazina në Konispol, rrezikohen banesat

Një zjarr i përmasave të mëdha ka shkrumbuar një magazinë dhe 2 godina të tjera në fshatin Mursi, Bashkia Konispol.
Mësohet se zjarri fillimisht ka filluar në një zdrukthtari, ku si shkak dyshohet të ketë qenë një shkëndije elektrike.
Më pas flakët e zjarrit janë përhapur edhe në 2 godina të një biznesi tjetër që shërbenin si depo dhe ambjent fjetjeje për punonjësit.
Për të shuar flakët kanë punuar 3 mjete zjarrfikse të Konispolit dhe Sarandës, pasi përhapja e zjarrit rrezikonte edhe banesat e fshatit Mursi, të cilat ndodhen vetëm disa metra larg vatrës së zjarrit.
Aktualisht zjarri është shuar, ndërkohë që vazhdojnë hetimet për të saktësuar shkakun e zjarrit.