Partia Demokratike publikoi sot dosjen e dënimit të Valdrin Pjetrit në Itali, vendimi i formës së prerë, dhënë nga drejtësia italiane 16 vite më parë.
Lidhur me dokumentet e publikuara kanë reaguar Valdrin Pjetri dhe Partia Socialiste, përmes Sekretarit të Përgjithshëm, Taulant Balla.
Pjetri tha se pret vendimin përfundimtar nga institucionet shqiptare dhe ato italiane, ndërsa Balla theksoi se dokumentet e paraqitura janë joligjore, por nuk mund të ketë qëndrim apriori për akuzat.
Ndërkohë Astrit Patozi, kreu i Bindjes Demokratike, thekson se rasti i Shkodrës na shërben për të kuptuar se qeverisja e “Rilindjes” ka degraduar aq shumë, sa ajo mund të rrëzohet e të humbasë edhe aty ku kandidon e vetme.
Postimi i Astrit Patozi
“RILINDJA” HUMBET EDHE KUR KANDIDON E VETME
Rasti i Shkodrës na shërben për të kuptuar se qeverisja e “Rilindjes” ka degraduar aq shumë, sa ajo mund të rrëzohet e të humbasë edhe aty ku kandidon e vetme.
Por kjo nuk është një arsye që mund t’i gëzojë ata që kanë frikë nga zgjedhjet. Sepse që atyre t’u vijë radha për të fituar, duhet të presin shekuj ose ajo ditë mund të mos vijë kurrë.
Ndërkohë, ky është një lajm shumë i mirë për të gjithë ata opozitarë, që besojnë dhe luftojnë për ta larguar me votë këtë qeveri të korruptuar, në rastin e parë që u del përpara.