Një shkëmbim për të kënaqur të gjitha palët. Mauro Icardi tek Roma dhe Edin Dzeko tek Interi. Argjentinasi po jeton si “i divorcuar” brenda në shtëpi dhe e ardhmja e tij mund të jetë kudo, por jo tek skuadra ku vetëm pak kohë më parë mbante shiritin e kapitenit, në spondën tjetër sulmuesi boshnjak e ka shprehur prej kohësh dëshirën e tij për t’i thënë lamtumirë qytetit antik dhe të zhvendoset në Milanon moderne.
Zikaltrit kanë gati ofertën prej 18 milionë euro (një pjesë e të ardhurave do të përfitohen nga kalimi i Perisic te Bayerni), por drejtuesi e Romës nuk kanë ndërmend ta largojnë 33-vjeçarin pa pasur ende një zëvendësues dhe duke parë që pista “Higuain” është ndërlikuar, atëherë verdhekuqtë kanë dalë me një tjetër propozim. Dzeko plus 35 milionë euro për të drejtat e Mauro Icardit.
26-vjeçari duket tashmë i hapur drejt këtij destinacioni, sepse vetë ai, por edhe përfaqësuesja, që është njëkohësisht edhe bashkëshortja e tij, Wanda Nara, kanë mbetur të kënaqur nga oferta e Romës, që konsiston në 7.5 milion euro në sezon, plus bonuse, që mund ta dërgojnë këtë shifër në 9 milionë euro.
Ka ende episode deri më datë 2 shtator, kur të mbyllet përfundimisht telenovela e merkatos, por duket se është drejt zgjidhjes misteri që lidhet me të ardhmen e Mauro Icardit dhe Edin Dzekos.
