Real Madrid ka fituar edhe në ndeshjen e dytë ndaj AS Roma, me rezultatin 2-0, duke u kualifikuar me rezultatin e përgjithshëm 4-1 për në çerekfinalet e Champions League, veprimtaria më prestigjioze në nivel klubesh në të gjithë planetin. Cristiano Ronaldo dhe James Rodriguez shënuan për ekipin e drejtuar nga Zinedine Zidane.
Real Madrid – Roma
Real Madrid bëri plot 18 goditje drejt portës së Romës në pjesën e parë, duke vënë rekordin në këtë edicion të Champions League, por pa arritur të shënojë asnjë gol. Megjithatë, miqtë italianë i patën dy raste për të hapur sfidën duke shënuar, por edhe ata nuk ia dolën. Dominimi territorial i Realit u kthye në efikasitet pas një ore lojë, kur ekipi “merengues” shënoi dy gola në katër minuta.
Lucas Vasquez, i porsa futur në fushë, kaloi Digne dhe krosoi për Cristiano Ronaldo, që i vodhi kohën mbrojtësit Manolas dhe portierit Szcesny, duke kaluar në avantazh Real Madridin. Katër minuta më vonë erdhi edhe goli i dytë, firmosur nga James Rodriguez, me një goditje tokazi me të majtën, pas pasimit të marrë nga Cristiano Ronaldo.
Vetëm dy minuta pas golit të dytë, Real mund të shënonte edhe golin e tretë, por golashënuesi më i mirë i Champions League, Cristiano Ronaldo, goditi jashtë porte edhe pse ishte i vetëm përballë portierit Szczesny. Real Madrid nuk e vuri për asnjë moment në diskutim kualifikim dhe futet mes tetë ekipeve më të mira të Europës, pasi në harkun e 180 minuta ishte superiore ndaj Romës.
Wolfsburg – KAA Gent
Krahas Real, skuadra tjetër që mori biletën për të qenë në çerekfinalet e Champions League është Wolfsburg, që i fitoi të dyja ndeshjet ndaj Gent, skuadra kampion e Belgjikës. Pas suksesit 3-2 para tre javësh në transfertë, nënkampionët e Gjermanisë fituan 1-0 në ndeshjen e kthimit, me golin e “ndërtuar” nga Julian Draxler dhe shënuar nga Andre Schurrle, 15 minuta para fundit.
