Kryeministri Edi Rama po përpiqet të tejkalojë thellimin e krizës politike në vend, pas 30 qershorit, edhe pse mesazhet e dhëna nga ndërkombëtarët, qofshin të BE-së apo nga SHBA, kanë identifikuar problematikën dhe kanë vënë theksin në gjetjen e një zgjidhjeje, përmes Gjykatës Kushtetuese.
Edhe pse kësaj të fundit mund t’i duhet edhe disa muaj që të bëhet funksionale, qëndrimi i fortë i opozitës, veçanërisht PD-së, duke mos hequr dorë nga kushtet e saj për garantimin e zgjedhjeve të lira, nuk ndihmojnë aspak Kryeministrin.
Kreu demokrat Lulzim Basha ka ashpërsuar tonet, madje në një kohë kur nga Presidenti Ilir Meta është dhënë si zgjidhje opsioni i zgjedhjeve për zgjidhjen e krizës, Kryetari i PD-së ka deklaruar se “prangat për politikanët që kanë vjedhur zgjedhjet” është hapi i parë për zgjidhjen e saj.
“Një proces që është nul dhe kriminal nuk mund të prodhojë asgjë të ligjshme. Shumica dërrmuese e refuzoi dhe shumë nga ata që detyroi me forcë, iu përgjigjën duke i bërë votat të pavlefshme.
Vlora 14%, Berati 14%, Durrësi 13.5%, Korça 14%, Shkodra 6%. Refuzimi popullor ka qenë plebishitar. 30 qershori është dërrmimi më i madh politik dhe moral i ndonje pushteti ne keto 30 vjet.
U faktua ajo që ne paralajmëruam: Është varreza politike e Edi Ramës”, ka deklaruar Basha.
Deklarata e kreut të PD-së vjen në një kohë kur duket se Kryeministri po merr një nga një njësitë e qeverisjes vendore pas votimeve të 30 qershorit, ndërsa kandidatët e Rilindjes kanë nisur detyrat dhe të tjerë janë në pritje të ulen në poltronet e kryebashkiakëve.
