Sot është afati i fudnit për regjistrimin e partive për zgjedhjet e 13 tetorit, bazuar në dekretin e Presidentit Ilir Meta. Por anëtarët e PS-së në KQZ kanë nisur pushimet çfarë e bën të pamundur mbledhjen e KQZ dhe marrjen e një vendimi.
Sot në KQZ depozituan kërkesat për regjistrim LSI dhe PR, ndërkohë që nga PD iu drejtua një thirrje anëtarëve të Komisionit që të respektojnë Kushtetutën, pasi në të kundërt do të përballen me ligjin.
Ndërkohë nga mazhoranca ka ardhur edhe reagimi i parë nga Sekretari i Përgjithshëm i PS-së, Taulant Balla.
“Zgjedhjet e 30 qershorit ishin një moment i rëndësishëm ku fitoi qytetaria, fitoi ligji, fitoi Kushtetuta e vendit dhe mendoj që mos ta bëjmë më qesharake sjelljen e opozitës dhe do të hezitoja të bëja ndonjë koment lidhur me ato që informoni ju sepse zgjedhjet e 30 qershorit janë zhvilluar, kanë përfunduar.
Të zgjedhurit prej tyre qofshin këta kryetarë të bashkive apo anëtarë të këshillave bashkiakë, kanë marrë detyrën tashmë ose janë duke marrë detyrën edhe në këtë moment që flasim bashkë.
Ajo që dua t’ju them është që dora jonë është e shtrirë për të bashkëpunuar pikë së pari me opozitën në parlament për të adresuar tërësisht rekomandimet e OSBE-ODIHR por edhe të KiE që lidhen me një reformë zgjedhore gjithëpërfshirëse me qëllim që zgjedhjet e përgjithshme të vitit 2021 të zhvillohen me një kod zgjedhor që ka adresuar të gjitha rekomandimet në 3 zgjedhjet e fundit”, tha Balla.
Ndërkohë nga ndërkombëtarët është kërkuar që ligjshmëria ose jo e dekreteve të Presidentit, që fillimisht anulloi 30 qershorin si datë zgjedhjesh dhe më pas dekretoi 13 tetorin të vendoset nga Gjykata Kushtetuese, e cila është jashtë funksionit.
deri më tani disa nga kryebashkiakët e shpallur fitues nga votimet e 30 qershorit kanë marrë zyrtarisht detyrat.
