Kryeministri Edi Rama prej disa ditësh poston në rrjet bllokimet që po u bëhen bizneseve nga tatimorët në kuadër të një aksioni të qeverisë kundër informalitetit. Kryesisht kontrollet janë shtrirë në zonat bregdetare, aty ku janë bllokuar edhe shumë nga bizneset, kryesisht hotele, bare dhe restorante.
E ndërsa Rama ndjehet entuziast nga rezultatet, shumë qytetarë e kundërshtojnë lidhur me kohën se kur po ndërmerret ky aksion.
Por në rastet e kritikave, Kryeministri nuk ka nguruar t’i përgjigjet qytetarëve, pa u kursyer.
“Ti mua më merr të keqen xhan, se unë kam pasur fatin të edukohem ndryshe dhe kam uri për të krijuar, ndryshuar, realizuar e fituar beteja me të vjetren e me injorancën! S’më motivon as e ngrëna e as e pasura e gjërave që nuk merren me vete në varr, po e shijuara e krijimit, e punës transformuese, e betejës për bindjet e mia dhe e lëna pas e kujtimit të mirë për të tjerët! Po që ti kuptosh këto ti dhe ata që njësoj si ti, e kanë mendjen ke peshku e ke lepuri, është e pamundur, prandaj vazhdojmë kështu, secili në atë që i ka rënë për hise të bëje në këtë botë😁 Dhe meqë më ka rënë për hise të merrem e të sqaroj edhe njerëz të pasqarueshëm si ti, ja ku e bëra edhe këtë”, shkruan Rama në një koment, duke iu përgjigjur një prej ndjekësve të tij.
Ndërkohë, një tjetër ndjekësi i drejtohet “ti flet përçart i dashur, po s’ka problem, kjo botë ka vend për të gjithë dhe mos ki merak as për atë pallatin, as për atë tjetrën që thua e aq më pak për popullin, se Shqipëria nuk është siç e sheh syri yt i qorruar prej mllefit të padijes dhe siç e thotë goja jote e shthurrur prej padijes që prodhon mllef”.
